|| कलाकार हा उत्तम शेखर ||

|| श्री कृष्ण भगवान की जय || श्री गोमाता की जय||

    

 

|| गोमाता आपुली देवता || गाय आपुली माय ||
गाय हिरवा चारा खाते | तोंडामध्ये रवंथ करते | आम्हा सकस दूध देते | आबाल वृद्धांसाठी ||१|| गाय आम्हांस दूध देते | गावक-यांस रोजगार देते | भूकेल्याचे पोट भरते | कामधेनू माता ||२|| जमिनीची करावी मशागत | त्यात मिसळावे शेणखत | पिकेल उत्तम शेत | पारंपरिक पद्धतिने ||३|| शेती करावी शेणखतयुक्त | वापरावे शेणखत फक्त | करावे जमिनीस रसायनमुक्त | सर्व शेतक-यांनी ||४|| अधाशासारखी नसावी भूक | जमीन ठेवावी सुपीक | जमीन होईल नापीक | काही रसायने घातक ||५|| गाय बकरीचे खत | किंवा नैसर्गीक खत | ओल्या कच-यांचे खत | शेतीसाठी वापरावे ||६|| फळे भाज्या गावात पिकती | ट्रक भरभरून शहरात येती | कच-यांचे सर्वत्र साठती  | ढीग साली देठांचे ||७|| शहरात हा मुबलक कचरा | त्याचे खातात रुपांतर करा | तेच शेतीसाठी वापरा | उत्तम असे पुनर्वापर ||८|| शहरांत कच-यांचा प्रश्न सुटेल | गावात खताचा प्रश्नं मिटेल | शहर-गावांस आधार मिळेल | एकमेकां सहाय्य करू ||९|| रसायने अती वापरू नका | जमिनीचा कस घालवू नका | जीव धोक्यात घालू नका | समस्त जीवजंतूंचा ||१०|| गाई म्हशी दूध देती | बैल शेतामध्ये राबती | उभे आयुष्य अर्पण करती | मानवजातीसाठी ||११|| गाय,बैल म्हातारी होता | न द्यावे त्यासं मारण्याकरिता | माता पित्यासम सांभाळता | पुण्य लाभेल ||१२|| गुरेढोरे होता निकामी | त्यांना पाहिजे चाराभूमी | दान देऊनी तुम्ही आम्ही | निर्माण करावी ||१३|| अनाथ मुलांसाठी शाळा | कर्णबधीरांसाठी शाळा | तशाच बांधाव्या गोशाळा | या भारतभूमीत ||१४|| गाय आपुली आहे माता | गोमाता आपुली देवता | जी प्रिय कृष्ण भगवंता | जीवापाड सांभाळावी ||१५|| गाई म्हशी निकामी होता | बळेच त्यांना गाडीत बांधता | मारण्यासाठी खाटिकांस देतां | हे तर महापाप ||१६||	शेणखताचा उपयोग होतो | जमिनीचा कस वाढतो | शुद्ध गोमुत्राचा उपयोग होतो | रोग निवारणासाठी ||१७|| गोउत्पादने खास असती | गोसंस्था ती निर्माण करती | वापरून त्याची घ्यावी प्रचीती | प्रत्येक व्यक्तीने ||१८|| गोमय सर्वांकरिता | गोमुत्र औषधांकरीता | अनेक प्रसाधन उत्पादनांकरीता | वापर आहे प्रचलित ||१९|| गोशाळेस दान द्यावे | गोप्रजातीस सांभाळावे | गोउत्पादनांस जाणून घ्यावे | गोशाळेत जाउनी ||२०|| गाईच्या दुधाने शक्ती मिळते | गाईच्या दुधाने कांती चमकते | मेंदूची स्मरणशक्ती वाढते | बुद्धीवर्धक उपाय ||२१|| रसायनांनी थैमान घातले | फळे भाज्या सर्वत्र मिसळले | नसानसांत अवघे भिनले | मानवी जीवनांत ||२२|| प्रदूषणावर आहे उपाय | गाय आपुली माय | गाईविना  तरणोपाय | आता नाही ||२३|| व्रत हे अंगिकारावे | गाईस आपुले मानावे | गाईचे ऋण फेडावे | ह्याच जन्मी ||२४|| मनात नसावा संशय | गाय तारील निःसंशय | आता करावा सुनिश्चय | गोवंश वाढवावा ||२५|| गरीब आणि धनीकाने | दान द्यावे स्वखुशीने | गोमहती अभिमानाने | सांगावी जगाला ||२६|| गाय खाटिकांस देता कोणी | विरोध करावा सर्वांनी | प्राण गाईचे वाचवुनी | गोहत्या रोखावी ||२७|| गोमांसाची निर्यात | नका करू परदेशात | भारतीयांची गोप्रजात | वाचविली पाहिजे ||२८|| गाय नसावी संकरीत | आयात थांबवा त्वरित | नष्ट न व्हावी गोप्रजात | भारत देशाची ||२९|| भारत देश कृषिप्रधान | गोधनाने व्हावा सधन | समृद्धीचे प्राचीन साधन | अवलंबावे देशाने ||३०|| करावे गाईंचे रक्षण | करावे धर्माचे रक्षण | करावे राष्ट्राचे रक्षण | प्रत्येक भारतीयाने ||३१|| || श्री कृष्ण भगवान की जय || || श्री गोमाता की जय||
प्रेषक - सुरेश रघुनाथ पित्रे. पत्ता- "वैद्य सदन", पहिला मजला, राघोबा शंकर रोड, लोअर चेंदणी, ठाणे (पश्चिम) , पिन कोड क्र.-४००६०१ संपर्क - ०२२ - २५३३३८६९ , २५३२६४२९ ,                 भ्रमणध्वनी - ९००४२३०४०९         Email ID - kharichavata@gmail.com

हे स्तोत्र दादर येथून निघणा-या "भक्तीसंगम" MAY 2011ह्या मासिकात प्रकाशित झाले आहे.

PRESS CTRL KEY AND SCROLL UP THE MIDDLE BUTTON OF MOUSE TO SEE ENLARGED VIEW.

श्रीमत सदगुरू संत, गाडगे बाबा महाराज कि जय

|| श्री गाडगेबाबा महाराज कथा सार स्तोत्र ||
|| कर्मयोगी, वैराग्यमूर्ती, अनाथांचा नाथ, व्रतस्थ || || श्रीमत सदगुरू संत, गाडगे बाबा महाराज कि जय ||
विदर्भात जिल्हा अमरावती | महाशिवरात्रीस शेड गावी | आई सखुबाई,वडील झींगराजीचा  | बालक डेबू जन्मला ||१|| वडिलांचा मृत्यू लवकर झाला | डेबू  मामांच्या घरी राहिला | दापुरा गावी मोठा झाला | गुराख्याचे काम करुनी ||२|| डेबुचा बालविवाह झाला जरी | मामा डेबुचे झाले कर्ज बाजारी | गहाण पडली सावकार दरबारी | शेतजमीन मामांची ||३|| सावकार मतलबी होता हुशार | खटला चालविला जमिनीवर | तडजोड करुनी काही एकर | जमीन लाटली सावकाराने ||४|| नंतर एक प्रसंग घडला | डेबूला एक साधू भेटला | घरदार संसार डेबूने सोडला | डेबू झाला बैरागी ||५|| आकाश हेच झाले छप्पर | पृथ्वी हेच बनले घर | डोक्यावर गाडग्याचे खापर | वैराग्यमूर्ती गाडगेबाबा ||६|| आधी काम झाडलोट करणे | मग खापरीत भिक्षा मागणे | भूकेपुरतेच अन्न घेणे | चून भाजी अर्धी भाकर ||७|| गोपालागोपाला देवकीनंदन गोपाला | हाच मंत्र त्यांनी जपला | चिंध्यांचाच सदरा घातला | काठी खापर हातामधे ||८|| स्वतः कोरडी भाकर खाती | जनावरास खाऊ घालती | भुकेल्या जीवाचे पोट भरती | स्वतःचा घास देऊन ||९|| स्वतः झाडू हाती घेतला | रस्ता झाडून स्वच्छ केला | स्वच्छतेचा संदेश दिला | अविरत अहोरात्र ||१०|| सकाळी गावं स्वच्छ करणे | सांज सकाळ भिक्षा मागणे | रात्री कीर्तन प्रबोधन करणे | व्रत हे गाडगे बाबांचे ||११|| बकरे कोंबडे कापू नका | मुक्या प्राण्यास मारू नका | अंधश्रद्धा ठेऊ नका | समजाविती गावक-यांना ||१२|| तंबाखू तुम्ही खाऊ नका | दारूला स्पर्श करू नका | व्यसनात तुम्ही गुंतू नका | सांगती गाडगेबाबा ||१३||	अनेक बांधल्या धर्मशाळा | मुलांसाठी बालवाडी शाळा | गाई गुरांसाठी गोशाळा | बांधल्या जनश्रमदानामधुनी ||१४|| अनेक बांधली इस्पितळे | पाण्यासाठी पाणपोई तळे | बांधू नका माझी देऊळे | खडसाविले लोकांना ||१५|| बाबांनो एकवेळ उपाशी रहा | पण मुलाबाळांस शिकवा | घर गावं स्वच्छ ठेवा | हाच मंत्र बाबांचा ||१६|| आधी सोडावी व्यसंनाधीनता | मग करावी ग्रामस्वच्छता | रुजवा बाल प्रौढ साक्षरता | त्रिसूत्री गाडगे बाबांची ||१७|| जे का रंजले गांजले | त्यासी म्हणे जो आपुले | हे तत्व ज्यांनी जपले | ते श्री संत गाडगे बाबा ||१८|| ग्रामस्वच्छता करीत राहिले | गावोगावी फिरत राहिले | जनजागरण करीत राहिले |  व्रतस्थ कर्मयोगी ||१९|| चंदनापरी झिजविली काया | अनाथावारी केली माया | दिनदुबळ्यास दिली छाया | आश्रमशाळा बांधुनी ||२०|| जनसेवा हेच मानिले तत्व | स्वच्छतेचे सांगितले महत्व | कर्मयोगाने मिळाले अमरत्व | श्री संत गाडगे बाबांना ||२१|| अखेर वय वर्षे पंच्याहत्तरीत | प्रकृती गेली खालावत | बाबांची मालवली प्राणज्योत | रात्री सुमारे बारा वाजता ||२२|| पहाड तो दुःखाचा कोसळला | भक्तांनी हंबरडा फोडला | आसमंत सारा दणाणून गेला | पेठी नदीच्या पुलाजवळ ||२३|| गाडगेबाबांचा घेऊ वसा | चालवू त्यांचा पुढे वारसा | संदेश घेऊ गाडगेबाबांचा | श्रमदान जनसेवेचा ||२४|| गाडगेबाबा सदगुरू मूर्ती | सर्वदूर ज्यांची पसरली कीर्ती | चला गाऊ त्यांची महती | समाजसेवा करुनी ||२५|| || ॐ शान्तिः शान्तिः शान्तिः  || || शुभम भवतु  ||  शुभम भवतु  ||  शुभम भवतु  ||
प्रेषक  - सुरेश रघुनाथ पित्रे. पत्ता- " वैद्य सदन ", पहिला मजला, राघोबा शंकर रोड, लोअर चेंदणी, ठाणे (पश्चिम) , पिन कोड क्र. - ४००६०१ संपर्क - ०२२ - २५३३३८६९ ,२५३२६४२९ , भ्रमणध्वनी - ९००४२३०४०९           Email ID - kharichavata@gmail.com
|| कर्मण्येवाधिकारस्ते मा फलेषु कदाचन । मा कर्मफलहेतुर्भूर्मा ते सङ्गोऽस्त्वकर्मणि ॥ | तेरा कर्म करने में ही अधिकार है, उसके फलों में कभी नहीं । इसलिए तू कर्मों के फल हेतु मत हो तथा तेरी कर्म न करने में भी आसक्ति न हो ।

हे स्तोत्र दादर येथून निघणा-या "भक्तीसंगम" मार्च 2011ह्या मासिकात प्रकाशित झाले आहे.
PRESS CTRL KEY AND SCROLL UP THE MIDDLE BUTTON OF MOUSE TO SEE ENLARGED VIEW.

|| करीअर कथा ||

हि कविता खाली दिलेल्या संकेत स्थळावरही आहे. 
http://new/sec_yuva/may2011_yuva01.html

बारावीचा निकाल | मग सीईटीचा परीक्षाकाळ |

परीक्षांचा झाला सूकाळ | आता ठाई ठाई ||१||

इंजिनीअरिंग का मेडिकल | जाणावा आपुला कल |

पडताळावे इतर सकल | विषय आणि पर्याय ||२||

शिक्षणाचे मार्ग सगळे | पर्याय अनेक वेगळे

जे आपणा न कळे | तज्ञांना विचारावे ||३||

बारावी नंतर काय | प्रश्न करती वडील माय |

आहे यावर उपाय | फक्त मुलांची आवड ||४||

बाळाचे पाय पाळण्यात दिसती | उक्ती अनुभवी सांगती |

त्याची घ्यावी प्रचिती | मुलांच्या भल्यासाठी ||५||

आवडीचे क्षेत्र निवडावे |   तसेच मार्गदर्शन करावे |

मुलांचे भले पाहावे | प्रथम त्यांच्या आवडीत ||६||

आपली आवड कशात | जाणून त्या विषयांत |

मेहनत करावी त्यांत | मुलांनी प्रगतीसाठी ||७||

प्रसिध्द खेळाडू किती | यशस्वी ते उद्योगपती |

त्यांनी केली प्रगती | आवडीच्या विषयांत ||८||

जी आपली आवडी | त्यात घेतली आघाडी |

ते क्रिकेट खेळगडी | फक्त बारावी पास ||९||

गुण असती उपजत | त्यांनाच घालावे खत |

नाही येणार आफत | भविष्यात चिंतेची ||१०||

आवडीच्या विषयात | थोडीच पुरते मशागत |

विषय होईल अवगत | पटकन लवकर ||११||

गायक सुरात नाहले | नायक अभिनयात मुरले |

नर्तक तालात नाचले | आनंदात सुखेनैव ||१२||

चित्रकार चित्रात रंगले | शिल्पकार शिल्पात घडले |

कलाकार कलेत रमले | जातीचे कलावंत ||१३||

आवडीच्या विषयात करता कष्ट | आळस होतो नष्ट |

आलेख दिसतो स्पष्ट | उज्ज्वल भविष्याचा ||१४||

काही चालती धोपट मार्गे | काही धावती झटपट मार्गे |

नका जाऊ आडमार्गे | पैसा आणि प्रगतीसाठी ||१५||

जपावी नैतिकता | निवडा आवडीची उद्योजकता |

नेटाने कष्ट करता | प्रगती आहे निश्चित ||१६||

कोणी करती चर्मोद्योग | कोणी करती कुटीरोद्योग |

करावा असाच उद्योग | मराठी माणसाने ||१७||

निर्णय नसावा अयोग्य | विचार करावा सुयोग्य |

शिक्षण निवडा स्वयोग्य | आवडीच्या विषयात ||१८||

छंद विषयांत नाही ताप | कामाचा नाहीच संताप |

शक्य होते करणे प्रताप | दडपणाशिवाय ||१९||

काम होईल झटपट | उत्साहात छान पटापट |

वाटणार नाही कटकट | आवडीच्या विषयाने ||२०||

आवड असता नाही डोकेफोड | बोलता येईल फडाफड |

प्रश्नांची उत्तरे सडेतोड | देता येतील सदैव ||२१||

आयुष्य सरेल छान मस्त | मन राहील आनंदे चुस्त |

काम होता बिनधास्त | सूर सापडेल प्रगतीचा ||२२||

काम जमता निश्चित | भविष्य नसेल अनिश्चित |

जीवन प्रवाह विनाखंडित | पार पडेल सुरळीत ||२३||

क्षेत्र आवडीचे निवडावे | पदवीस प्राप्त करावे |

प्राविण्य पुढे मिळवावे | प्रयत्ने सातत्याने ||२४||

करिअरची होता घटट मुळे | जीवन वृक्ष फुले फळे |

जीवन अवघे उजळे | समस्त कुटुंबियांचे ||२५||

करिअर कथा वाचावी | तशीच लोकांस सांगावी |

कथेची प्रचिती घ्यावी | सर्व विद्यार्थ्यांनी ||२६||

सुरेश पित्रे. चेंदणी, ठाणे (पश्चिम)

 संपर्क - ०२२ - २५३३३८६९ ,२५३२६४२९ ,

भ्रमणध्वनी – ९००४२३०४०९,

Email ID - kharichavata@gmail.com

|| वारी आषाढीची ||

होता राम प्रहर | करू विठ्ठलाचा गजर | सातशे वर्षे निरंतर | परंपरा वारीची ||१|| धोतरटोपी वेश पांढरा | घालूनी स्वच्छ सदरा | पंढरीची वाट धरा | म्हणे वारकरी ||२|| खाऊ चून भाकरी | चला गाठू पंढरी | मुखे बोलू श्रीहरी | म्हणे वारकरी ||३||

तुळस घेऊ डोईवरी | आम्ही विठूचे माळकरी | विठ्ठल विठ्ठल हरी | म्हणे वारकरी ||४|| सगुण भक्तीचा संग | वारकरी होतो दंग | गातो रसाळ अभंग | राम कृष्ण हरी ||५|| हरीनाम गर्जते वाणी | चालू आम्ही अनवाणी | पाहू चला चक्रपाणि | पांडुरंग हरि ||६||

वेध आता आषाढीचे | नाम मुखी विठ्ठलाचे | विठ्ठल नामे नाचे | विठूचा वारकरी ||७|| टाळ मृदुंग वाजे | तुळशीमाळ गळा साजे | विठ्ठल नाम गर्जे | चाले वारकरी ||८|| ऊंच पताका फडकती | वारकरी फेर धरती | घागरी  डोईवरती  | चाले वारकरी ||९||

चंदन टिळा कपाळी | टाळ वीणा वाजे चिपळी | पालखी हि आगळी | चाले वारकरी ||१०|| भक्त जमले प्रांगणी | अश्व धावतो रिंगणी | पहा सोहळा पटांगणी | म्हणे वारकरी ||११|| वारक-यांचा हा मेळा | उभा विठोबा सावळा | पाहू भरुनिया डोळा | म्हणे वारकरी ||१२||

अबीर गुलाल उधळा | उधाण भजनी मंडळा | आनंद भरला सगळा | विठ्ठलाच्या दारी ||१३|| उत्सव हा वेगळा | एकमेका भेटू गळा | पाहू विठू वेळोवेळा | चंद्रभागेतिरी ||१४||

प्रेषक  - सुरेश रघुनाथ पित्रे. चेंदणी, ठाणे संपर्क - ०२२ - २५३२६४२९ , भ्रमणध्वनी - ९००४२३०४०९ , Email ID - kharichavata@gmail.com